O técnico do Pontevedra Club de Fútbol, Rubén Domínguez, valorou o enfrontamento fronte ao Guadalajara como un "partido espeso no que non tivemos moita fluidez" e no que, aínda por riba "con moi pouquiño puxémonos por detrás e tocounos remar".
A pesar de controlar a segunda parte, o adestrador recoñeceu que "non acabamos de xerar todas as ocasións que nos gustaría" e destacou que o acortamento do plantel complicou os cambios durante o partido.
Rubén comentou a situación dalgúns xogadores como "Miki e Luisao, que nos piden o cambio". Neste sentido, subliñou que "hai que tamén ter moito coidado, porque temos tres partidos esta semana e había risco de que algún xogador caese", e aproveitou para sinalar a responsabilidade que deben asumir xogadores como Expósito, Nico Conesa ou Denia, "que van ter tamén a súa oportunidade na Copa".
Sobre o desenvolvemento do encontro, Domínguez explicou que "eles están a xogar ultimamente cunha especie de 4-4-2 defendendo e meteron un máis por dentro e afundían os seus extremos", o que dificultou desequilibrar o partido pese ao control que tiñan.
Sobre o gol encaixado, apuntou que "hai que ser moito máis exixentes co tema de que non nos fagan gol con tan pouquiño, porque vemos o que custa facer un gol nesta categoría e hoxe, pois outra vez, con moi pouquiño fannos gol e hai que remar".
Finalmente, destacou o esforzo e compromiso do equipo en condicións complicadas como o estado do terreo de xogo, que "estaba moi pesado. Fixemos un esforzo grande e non me cansarei de dicir que é un equipo moi honrado, que non se deixa nada dentro".
Agora, "tócanos un momento no que o plantel o temos un pouquiño curto, pero hai que morrer cos que somos e puntuar, gañar, puntuar, gañar" e tratar de superar, dentro de tres días, a eliminatoria de Copa contra o Eibar.