"Non sei como explicar o partido de hoxe".
Con esta frase, aínda asimilando o vivido, arrincou a comparecencia de Rubén Domínguez no Couto tras superar, na quenda de penaltis, a primeira eliminatoria da Copa do Rei fronte á UD Ourense.
"Tentámolo de todas as maneiras e xusto da maneira máis fea é como entra o gol. Creo que durante o partido fixemos méritos suficientes para non chegar á prórroga. É certo que os primeiros 15 minutos igual non entramos do todo ben porque ao final a UD Ourense estaba con enerxía excitada, a súa xente empuxando e tiveron ese gol de falta lateral, pero creo que hai que darlle moito valor a como se recompuxo o equipo, como creu até o final", analizou o técnico granate.
De feito Rubén quixo resaltar un detalle: "Fixarvos como celebraron o gol, como se reunían nas prórrogas. Este equipo ten alma e vaino a seguir mostrando até o final", asegura sobre un Pontevedra "que nunca se rende, hai que roelo. Gústame cando a afección empeza a cantalo porque nos identificamos, moito con iso".
Tamén foi especial a presenza numerosa de afeccionados pontevedreses, porque "conectamos outra vez coa nosa xente, coa cidade de Pontevedra, e van ter un partido bonito para gozar. Aí van saber o que é Pasarón os que veñan", avanza o preparador.
Ademais quixo resaltar o papel de xogadores que até a data tiveran menos oportunidades, ou mesmo estaban inéditos como o caso de Edu Sousa e que "viñeron a un escenario difícil e foron protagonistas"
Por todo iso mostrouse satisfeito especialmente por "honrar o escudo. Eu creo que estes mozos están a honrar o escudo".
Agora, xa no bombo da segunda rolda, só queda "esperar con ilusión o sorteo e que Pasarón se encha".