Aínda que é 'choqueiro' de nacemento, Iván Pérez Berjano creceu e está arraigado a Lourizán. Monte e litoral que acabaron marcando e seguen trazando a súa traxectoria profesional. De Pontevedra baixouse ao sur, a Granada. Catro anos despois regresou Graduado en Ciencias Ambientais e tratando de reencontrarse persoal e profesionalmente no seu lugar primixenio.
Desde 2016 preside a Mancomunidade de Montes de Pontevedra. O seu proxecto estrela está adaptado ás tendencias actuais: Savia Nova, vídeos divulgativos a través da canle Youtube que conciencian sobre o coidado do monte.