Un novo lugar de Marcón xa ten toda a súa iluminación pública con lámpadas LED. Trátase da Peralba, onde o Concello investiu algo máis de 30.000 euros.
En concreto, cambiáronse as luminarias de sodio por 46 lámpadas LED. Instalouse, tamén, un cadro eléctrico e seis báculos para completar a iluminación nalgúns puntos.
Este investimento súmase a outros proxectos anteriores cos que se dotou ao ámbito da Peralba de nova rede de saneamento e cos que se realizaron obras de pavimentacións, canalizacións de pluviais e incorporación de sobreanchos e medidas de seguridade viaria.
Os traballos consistiron na incorporación de sobreanchos en distintos puntos e o posterior asfaltado de 900 metros, así como a instalación de 500 metros de canalizacións de pluviais, de varandas en espazos elevados, colocación de lombos e sinalización viaria.
Todas estas obras foron visitadas, acompañados por un grupo de veciños, polo alcalde de Pontevedra, Miguel Anxo Fernández Lores, e o concelleiro do rural, Alberto Oubiña.