Os datos da Enquisa de Poboación Activa (EPA) do primeiro trimestre de 2016 reflicten que a taxa de paro en Pontevedra é do 17,6 por cento, unha cifra menor que en Lugo (19,0%), Vigo (19,9%) e Ferrol (27,6 %).
Este dato supón unha baixada de medio punto en Pontevedra ao respecto da EPA anterior.
A cidade do Lérez pechou o pasado mes de marzo cunha taxa de ocupación do 49,3% e de actividade do 59,8%.
A EPA tamén reflicte que subiu o paro en Galicia en 5.200 persoas, un 2,31% máis con respecto ao período anterior, malia caer a poboación activa e a poboación ocupada.
Trátase dun incremento nove veces superior ao rexistrado no conxunto do Estado, onde a subida foi do 0,25%.
Deste xeito, o número total de galegos en situación de desemprego acada os 227.900. Isto supón que a taxa de paro medrou na nosa comunidade até nove veces máis que no conxunto do Estado, onde a subida foi do 0,25%.
Dende o sindicato CIG valoran que é "especialmente alarmante" que se produza este incremento cando, parello a isto, cae o número de persoas activas en 6.200, situándose a taxa de actividade no 53,1%, e cae tamén o número de persoas ocupadas en 11.400, acadando unha taxa de ocupación do 43,5%.