O alcalde de Barro, Xosé Manuel Fernández Abraldes, realizou unha avaliación positiva dos seus dez anos dirixindo o Concello, durante un encontro cos medios de comunicación.
Sinalou que durante este período conseguiu recuperar a estabilidade financeira da administración local e sentar as bases para importantes proxectos estratéxicos que se materializarán este 2025.
A nova depuradora central (EDAR) do Carballal preséntase como unha das actuacións máis relevantes. O proxecto, que supera os tres millóns de euros de investimento e será financiado conxuntamente pola Xunta e o Concello, permitirá estender o saneamento a todo o municipio.
Ademais, indicou o rexedor, as vivendas que aínda non teñan conexión á rede poderán baleirar as súas fosas sépticas nestas instalacións.
O alcalde destacou que o éxito deste proxecto débese a un traballo metódico: primeiro encargouse un estudo para determinar a mellor localización, logo adquiriuse a parcela, elaborouse o proxecto e tramitáronse os permisos sectoriais. Esta dilixencia fixo que Augas de Galicia apostara decididamente por Barro para acometer a obra da nova EDAR.
O segundo gran proxecto que verá a luz este ano é o novo centro de saúde.
A Consellería de Sanidade xa ten adxudicada a redacción do proxecto e nos próximos meses iniciará o proceso para licitar a súa construción.
Abraldes comprometeuse a garantir que as novas instalacións conten con todo o persoal sanitario necesario para ofrecer un servizo de máxima calidade á veciñanza.
Durante estes dez anos, Fernández Abraldes afirmou que centrou a súa xestión en tres eixos principais: a mellora dos servizos municipais, a dinamización social e cultural do concello e o desenvolvemento das parroquias para facelas máis habitables e atractivas como reclamo para a poboación.
De cara aos próximos anos, o alcalde sinalou como prioridade a mellora dos centros educativos do municipio.
Abraldes mostrou a súa disposición para volver encabezar a candidatura do BNG nas vindeiras eleccións municipais, asegurando que mantén "as mesmas ganas e ilusión que o primeiro día" para continuar liderando o goberno municipal.