O colectivo ecoloxista Anduxia presentou un escrito no Concello de Bueu dirixido ao alcalde Félix Juncal reclamando a instalación urxente do filtro UV na Estación Depuradora (EDAR) de Bueu.
Desde o colectivo fanse eco da petición que a Xunta de Galicia dirixiu ao Concello para que se instale este filtro que ten como función purificar con sistema ultravioleta a auga, de maneira que desapareza o material xenético de calquera microorganismo que se atope na auga sen que produza infección.
No escrito lembran ao rexedor que a asocación leva anos reclamando a instalación deste sistema na depuradora ao tratarse dunha obrigación municipal e da empresa concesionaria do servizo de saneamento (Aqualia). Tamén alertan de que este sistema de desinfección ou de tratamento terciario é obrigatorio para cumprir coas directrices da Unión Europea.
Insisten en que a EDAR de Bueu verte nunha zona sensible como é a ría de Pontevedra onde se cultivan e recóllense moluscos, ademais de practicarse a pesca profesional. Alertan de que a deficiencia se recolle en todos os informes e controis que Augas de Galicia realiza sobre a depuradora, a pesar de que leva 14 anos instalada.
Acusan ao Concello de inacción do mesmo xeito que á empresa concesionaria e os responsables de Anduxia advirten que se, "nun período de tempo razoable", non se realiza a instalación estudarán presentar unha denuncia ante a Unión Europea.