O Concello de Pontevedra non é responsable de dúas verteduras de augas residuais que se produciron no río Gafos, en decembro de 2010 e xaneiro de 2011, e polos que Augas de Galicia sancionoulles con 15.000 euros. Así o ditaminou o Xulgado Contencioso Administrativo número 2 de Pontevedra, ao que recorreu o goberno municipal tras esgotar a vía administrativa.
Na sentenza, feita pública este luns polo goberno municipal, advírtese que se trata dun "problema estructural" do sistema de saneamento, é dicir, no colector do río Gafos. Nas súas obras de mellora, recorda o xuíz, está implicada a propia Xunta de Galicia. Aínda que como recordou Raimundo González, trátase duns traballos paralizados recientemente pola administración autonómica.
Recorda ademais o titular Xulgado Contencioso Administrativo número 2 de Pontevedra que a mellora deste colector do río Gafos "pode considerarse unha obra de carácter supramunicipal", á vista da achega de augas doutros municipios como o de Vilaboa.
Aceptando as alegacións presentadas polo Concello de Pontevedra, o xulgado conclúe que as verteduras residuais debéronse á saturación do saneamento e á interferencia dun terceiro, polo que non estima responsabilidade algunha do goberno municipal e que tampouco se acreditou que se chegase a alterar a calidade das augas.
Segundo Raimundo González esta sentenza é "moi importante" para o Concello, xa que "cada certo tempo hai unha sanción similar", e agora demóstrase nos xulgados, dixo, "que non é un problema de mantemento senón unha cuestión estrutural", que depende en todo caso de Augas de Galicia.