O centenario das aparicións impulsa un Xubileo que porá a Pontevedra no mapa das peregrinacións

Este 10 de decembro de 2025 cúmprense cen anos das aparicións atribuídas á Virxe María e ao Neno Xesús a Sor Lucía na entón Casa-Colexio das Doroteas, hoxe Casa do Inmaculado Corazón de María, un episodio profundamente arraigado na memoria espiritual da cidade. Con este centenario, a Santa Sede concedeu a Pontevedra un Ano Xubilar, que se prolongará até o 10 de decembro de 2026 e que promete atraer a miles de peregrinos.

A cita tivo o seu pistoletazo de saída na tarde deste martes 9 cun acto institucional na Real Basílica de Santa María a Maior. O templo acolleu a fieis, curiosos e a unha ampla representación de autoridades eclesiásticas, civís e militares. A cerimonia estivo presentada por Rosanna López Salgueiro, pregoeira da Semana Santa de 2025, e contou con intervencións musicais a cargo do gaiteiro Óscar Ibáñez.

Un dos momentos centrais foi a lectura, por parte do vicecanciller da Diocese de Santiago, Manuel Jesús Formoso Fernández, dos decretos asinados en Roma o pasado 19 de novembro polo rexente da Penitenciaría Apostólica, Krzysztof Józef Nykiel, en nome do Papa León XIV. Os documentos conceden aos peregrinos a posibilidade de obter a bendición apostólica e a indulxencia plenaria seguindo as condicións habituais. Sobre o lema escollido para este Xubileo —"María conservaba todo isto no seu corazón"— articúlase toda unha programación que combina liturxia, memoria histórica e actividade pastoral.

A xornada contou ademais coa presenza do arcebispo de Braga e Primado das Españas, José Manuel García Cordeiro; do arcebispo de Santiago, Francisco José Prieto Fernández; e do arcebispo de Zaragoza, Carlos Manuel Escribano, quen presidiu a misa que pechou o acto inaugural.

O día grande será, como cabería esperar, este mércores 10, data exacta do centenario. Real Basílica e Casa do Inmaculado Corazón de María coordinaranse para acoller misas, rosarios e procesións ao longo de toda a xornada. Haberá celebracións tanto pola mañá como pola tarde, incluíndo unha procesión desde a Casa do Inmaculado Corazón até a Basílica coa imaxe que lembra aquelas aparicións de 1925.

Todo iso desenvólvese nun contexto peculiar posto que este Xubileo local coincide e se solapa co Xubileo da Esperanza que Roma celebra en 2025 e co Ano Santo Compostelán de 2027, o que converte a Galicia nun foco continuo de peregrinación neste trienio.

Pontevedra, cidade de xubileos

Non é a primeira vez que Pontevedra se converte en meta xubilar. No ano 2000 formou parte da rede de templos designados durante o Xubileo Romano, e entre 2008 e 2009 celebrou os mil anos da freguesía de Santa María. A experiencia, sumada ao crecente fluxo de peregrinos relacionados con Fátima, preparou á cidade para recibir aos case mil visitantes xa confirmados, procedentes de España, Portugal, Polonia e Estados Unidos, entre outros países.

A programación do Ano Xubilar inclúe tamén celebracións penitenciais, destinadas a facilitar a confesión previa á obtención da indulxencia. Desde a primeira semana de decembro, distintas parroquias da cidade acollerán estes encontros, nun calendario adaptado ao tempo litúrxico de Advento.

A Casa do Inmaculado Corazón de María, epicentro do Xubileo, pasou por un proceso de rehabilitación urxente tras décadas de deterioración. A actuación permitiu recuperar a súa estrutura, mellorar accesos e dotar ao edificio de espazos litúrxicos e servizos adaptados para a acollida de peregrinos. A Conferencia Episcopal Española lembra que estes traballos foron posibles grazas á axuda de numerosos particulares.

O recinto, que xa ofrece misas diarias e a posibilidade de reservar espazos para retiros e convivencias, aspira a converterse nun centro de referencia para peregrinos, con novos proxectos que inclúen zonas de acollida, biblioteca e arquivo.

Aínda que Fátima sexa o corazón internacional da devoción, foi en Galicia onde Sor Lucía viviu máis de dúas décadas fundamentais para a súa biografía e para a propia difusión da mensaxe. Aquí profesou os seus votos, aquí redactou boa parte das súas memorias —ás agachadas, no faiado— e aquí, segundo o seu testemuño, recibiu as aparicións de 1925 e 1926 que deron orixe á devoción dos primeiros sábados de mes.

Máis aló do seu contido estritamente relixioso, o Ano Xubilar de Pontevedra preséntase como un acontecemento cultural, social e patrimonial que aspira a atraer non só a fieis, senón tamén a visitantes interesados na historia do cristianismo, a arquitectura sacra, a tradición xacobea ou o fenómeno de Fátima.

Haberá procesións, actos institucionais, celebracións litúrxicas… pero tamén unha oportunidade para redescubrir espazos históricos da cidade e para observar como un século despois, o eco daqueles feitos segue convocando a persoas de todo o mundo.

En definitiva, Pontevedra abre un ano que combina fe, memoria e hospitalidade. E faino, como hai cen anos, coa vista posta nun pequeno episodio que, para moitos, marcou a vida espiritual dunha xeración… e que hoxe volve pór á cidade no mapa.