Almacenes Clarita e a Librería El Pueblo son os dous primeiros establecementos que recibiron o selo que os distingue como Comercio Seguro no centro histórico de Pontevedra. Este venres, o Centro Comercial Urbano Zona Monumental e a Federación Provincial de Comercio, Turismo e Mercados repartían estes distintivos en ambos os locais comerciais.
Miguel Lago, presidente da CCU Zona Monumental, explicaba que os asociados para recibir este selo teñen que realizar previamente o test autodiagnóstico da Xunta de Galicia. No caso destes establecementos a cualificación que obtiveron foi "moi elevada".
Esta cualificación acredita que tanto empregados como consumidores que acudan a este espazo de venda contan con todas as garantías de medidas de seguridade e protección decretadas polas autoridades sanitarias para evitar contagios da Covid-19.
A Federación Provincial traslada aos establecementos o consello de que realicen a proba para poder optar ao selo distintivo que ofreza seguridade á clientela. Esta entidade que se atopa actuando desde hai anos para establecer políticas comerciais atendendo aos requisitos marcados pola Xunta de Galicia e, ante esta situación actual, queren informar o sector da necesidade de ofrecer garantías para evitar situacións de risco.
Todo aquel empresario que desexe solicitar o selo ou recibir máis información pode poñerse en contacto con CCU Zona Monumental a través do correo electrónico [email protected] ou mediante o teléfono 685.896.569.