A devoción polo Corpus enche as rúas de Pontevedra

Centos de persoas participaron este domingo nos actos principais do Corpus Christi que se celebraron en Pontevedra.

Co obxectivo de abrir esta celebración a toda a cidade, os seus impulsores decidiron estrear un novo percorrido para a procesión que, por primeira vez, chegou até o santuario da Peregrina tras pasar gran parte do centro histórico.

A comitiva, que pasou por unhas rúas engalanadas coas alfombras florais realizadas polos voluntarios durante a noite, partiu desde San Bartolomé tras a misa das once.

A procesión percorreu Pai Sarmiento, Pasantería, Antonio Odriozola, Praza da Ferrería, Soportais, Manuel Quiroga, Don Filiberto e Michelena até a Praza da Peregrina, onde tivo lugar a bendición xeral e a reserva solemne do Santísimo Sacramento.

Os actos oficiais do Corpus arrancaron á primeira hora da mañá coa tradicional degustación da "parva", unha copa de cana e paz de millo.

Neste encontro participaron a alcaldesa accidental, Eva Vilaverde, e representantes dos grupos políticos da corporación, acompañando a membros do Gremio de Mareantes.

A continuación, a comitiva trasladouse á capela de San Roque para recoller parte das imaxes relixiosas que ían participar no desfile que, por acordo das parroquias, partiría da igrexa de San Bartolomé.

Durante o percorrido, os carrexadores guiaron as imaxes gremiais acompañados por numeroso público e polos nenos que recibiron a súa primeira comuñón este ano.

Á celebración do Corpus en Pontevedra acudiron, entre outras autoridades, a conselleira de Vivenda e Planificación de Infraestruturas, María Martínez Allegue; o portavoz municipal do PSdeG-PSOE, Iván Puentes; ou a senadora do PP, Pepa Pardo.