Leonor González Prieto, máis coñecida como Nené, foi homenaxeada este sábado pola asociación de veciños de Eduardo Pondal. Recibiu o premio co que, desde hai tres anos, o colectivo conmemora o 8 de marzo, Día Internacional da Muller.
O acto, celebrado no centro social do Gorgullón, serviu para recoñecer a traxectoria de Nené na vida social pontevedresa e a súa colaboración permanente con esta actividade.
Acompañada de numerosos veciños, entre os que se atopaban os edís Pilar Comesaña e Luís Bará, Leonor González repasou nunha charla coloquio os seus máis de trinta anos de activismo social á fronte da APDR, asociación da que chegou a ser presidenta.
Para a asociación veciñal, a homenaxeada distinguiuse sempre pola "defensa máis xusta, confortable e sen contaminación" e o seu traballo desinteresado polos veciños fíxolle merecedora de numerosos recoñecementos.
Tras o coloquio, Leonor González recibiu o premio que conmemora este recoñecemento. A continuación compartiu uns petiscos cos participantes no acto.
Entre os asistentes atopábanse, entre outros, o actual presidente de APDR, Antón Masa.