O Concello de Pontevedra continúa adiante coa primeira fase de asfaltados das rúas da cidade, logo do paso do inverno.
Este luns continúa coa avenida de Bos Aires e o barrio de Monte Porreiro, tras rematar as pavimentacións en Blanco Porto, Leiras Pulpeiro, avenida de Vigo, Sagasta, Benito Corbal e José Millán.
Na mañá deste luns pavimentouse a avenida de Bos Aires, entre a ponte de Santiago e a ponte dos Tirantes; e a rúa Eirín de Monte Porreiro que se asfalta completamente logo da recente instalación do saneamento e acondicionamento dunha parcela pública como estacionamento en superficie.
Pola tarde está previsto o fresado dalgúns treitos da rúa Alemaña. O asfaltado está planificado para o martes, 28 de maio, entre as 8 e as 15 horas.
Os traballos en Monte Porreiro continúan o martes, 28 de maio, na rúa Reino Unido co fresado de parte da rúa. O asfaltado está previsto para o mércores, 29 entre as 8 e as 14 horas.
O Concello recorda que a repavimentación consistirá no fresado e asfaltado ben de rúas completas ben de panos de rúas que se atopan en mal estado.
Ao igual que no centro do casco urbano, no barrio de Monte Porreiro a Policía Local tamén ten en marcha plans de tráfico específicos en cada caso.