Na mañá deste xoves 13 de abril, o colectivo de persoas xubiladas e pensionistas da CIG concentráronse nas prazas e rúas das sete cidades galegas para demandar a presencialidade dos servizos públicos e a revalorización das súas pensións. En Pontevedra, a Praza da Peregrina foi o punto de encontro.
Un xoves máis, Pontevedra acolle as demandas dos maiores que se ven afectados pola dixitalización dos servizos públicos. Xosé Manuel Igresias, asociado da CIG, afirma que "seguiremos mobilizándonos ata que nos fagan caso".
"Por teléfono líannos. Nós queremos que nos atendan presencialmente"
Están convencidos de que o mundo dixital non é para eles. "Por teléfono líannos. Falar con maquinitas é un ‘rollo’ porque nin nos entenden elas nin as entendemos nós. Dinnos '¿perdón?', '¿cómo ha dicho?'... Nós queremos que nos atendan presencialmente". Senten que "estamos totalmente fóra diso" e esixen ser atendidos de xeito presencial en todas as institucións públicas "como foi toda a vida". Para iso, na xornada desta mañá, os afectados recolleron sinaturas nas rúas de Pontevedra.
Do mesmo xeito, denuncian que as súas pensións se sitúan por debaixo do salario mínimo interprofesional. Piden a súa revalorización conforme ao IPC acumulado a final de ano e a recuperación dos seus dereitos. Ao respecto, Igresias afirma que as pensións "subiron un pouco" pero non o suficiente para o nivel de vida actual. Asegura que os prezos seguen subindo e que cada vez están a perder un maior poder adquisitivo.