O Concello da Lama incorporou este mércores un novo camión 100% eléctrico que se destinará á instalación e xestión do contedor marrón.
O alcalde, David Carrera, recibiu o vehículo nas dependencias municipais, destacando que se trata dunha aposta "por unha Lama máis sostible, eficiente e comprometida co futuro".
O novo camión, fabricado por OHM, conta cunha autonomía duns 280 quilómetros grazas á súa batería de litio de última tecnoloxía (63 kWh).
Ademais, incorpora tres modos de condución (ECO, Normal e Sport) e un sistema de brazo eléctrico que permite intercambiar distintas caixas. Entre elas figura unha caixa tipo satélite de 4 metros cúbicos, equipada cun elevacontedores para a recollida da fracción orgánica.
Esta configuración modulable dálle unha gran versatilidade para adaptarse ás diferentes necesidades do servizo.
A adquisición supuxo un investimento de 138.424 euros, financiado na súa totalidade pola Unión Europea a través do Plan de Recuperación, Transformación e Resiliencia (PRTR) e pola Deputación de Pontevedra.
Isto significa que non terá ningún impacto nas arcas municipais, algo que Carrera valorou como "unha oportunidade para renovar a flota e avanzar na transición enerxética sen comprometer o orzamento local".
Xunto coa chegada do novo vehículo, o Concello activará unha campaña de concienciación cidadá para impulsar a separación da materia orgánica, especialmente dirixida a establecementos hostaleiros e outros grandes produtores.
A intención é mellorar os índices de reciclaxe, reducir a mestura de residuos e fomentar hábitos máis responsables entre a veciñanza.
O novo camión permitirá tamén reducir emisións contaminantes e ruído, mellorar a eficiencia das rutas de recollida adaptadas ao contedor marrón e reforzar a implantación dunha economía circular no municipio.
Unha vez matriculado e asegurado, o vehículo incorporarase de inmediato ás tarefas de recollida.
Desde o Concello subliñan que estas actuacións exemplifican o potencial dos fondos europeos para impulsar unha xestión máis ecolóxica e eficiente dos residuos, beneficiando tanto ao medio ambiente como á calidade do servizo que recibe a cidadanía.