A Policía Nacional investiga un artefacto explosivo que se localizou na tarde deste martes na rúa Médico Ballina, na parroquia pontevedresa de Lérez.
O artefacto localizouno a propietaria dunha vivenda situada no número 1 desa rúa. Segundo relatou, herdou a propiedade e localizouna nun trasteiro
A muller relatou á Policía Nacional que descoñece de onde puido saír o artefacto, aínda que sabe que 20 anos atrás viviron nesa casa de aluguer persoas que traballan como militares.
Segundo a información facilitada polo 112, a muller contactou sobre as 17:45 horas indicando que localizaran o artefacto mentres estaban a limpar o trasteiro, ao que non acudían desde hai anos.
O artefacto é pequeno e ten forma de bala grande, segundo indican no 112.
Até o lugar desprazáronse efectivos dos TEDAX (Técnico Especialista en Desactivación de Artefactos Explosivos) da Policía Nacional.
Segundo indican fontes policiais, en principio, non detectan ningún perigo porque todo apunta a que o artefacto xa estaba percutido, isto é, non funcionaría.