Os socialistas de Pontevedra lograron conseguir o que, a priori, parecía complicado. Unir baixo unha mesma candidatura ás diferentes sensibilidades que conviven no seo do partido. Así, acordaron apoiar a unha figura de consenso para liderar a formación.
A elixida é a actual secretaria xeral do PSdeG-PSOE na cidade, Maica Larriba, que continuará catro anos máis á fronte da agrupación municipal.
Ela estará á fronte da única candidatura que se someterá ao xuízo da asemblea extraordinaria que o PSOE pontevedrés celebrará mañá domingo, a partir das 11:30 horas, no Hotel Galicia Palace.
Larriba, segundo fontes socialistas, afronta esta responsabilidade "con ilusión" e co obxectivo de impulsar unha renovación que abra unha etapa de "tranquilidade, unidade, forza e cohesión".
O novo número 2 da executiva municipal será Iván Puentes, que substituirá con Tino Fernández como secretario de Organización. Este continuará na executiva como membro nato, segundo confirman desde o partido.
Ademais, o PSOE de Pontevedra contará con tres vicesecretarios, que serán Yeyo Pérez Agulla, a edil Yoya Blanco e a deputada autonómica Paloma Castro.
Será ademais unha comisión executiva "paritaria e interxeracional" onde tamén estarán presentes todos os cargos institucionais, entre eles o concelleiro Marcos Rey, a senadora Marica Adrio e o deputado no Congreso Guillermo Meijón.
Na asemblea extraordinaria deste domingo, ademais de referendar á nova executiva, os socialistas de Pontevedra deberán elixir os seus sete delegados para o comité nacional do partido e aos dezaseis que formarán parte do comité provincial.