O Concello de Marín deu o pistoletazo de saída a unha importante campaña de limpeza viaria que se desenvolverá ao longo de todo o mes de setembro.
Cun investimento de case 25.000 euros, os traballos inclúen o chorreo a presión e a posta a punto dalgunhas das rúas e prazas máis transitadas do centro urbano.
Agora é posible levar a cabo esta medida porque a calor comeza a dar unha tregua e choveu tras un verán especialmente seco no que non foi posible realizar este tipo de limpezas pola necesidade de aforrar auga.
O Concello de Marín decidiu poñerse ao choio para devolverlle o mellor aspecto ao centro da vila.
A limpeza xa comezou e pasará por zonas como a Alameda Rosalía de Castro, Concepción Arenal, Méndez Núñez, Rúa da Roda, Fondo do Saco, Rúa de Serafín Tubío, Rúa Lameira, Rúa Exército e Marina, Rúa Alcalde José del Río, Rúa Dr Touriño, Rúa Busto de Arriba e Rúa Busto de Abaixo.
O obxectivo é deixar estas áreas en perfecto estado e, máis adiante, seguir ampliando a limpeza a outras zonas do municipio.
Desde o Concello tamén se fai un chamamento á colaboración dos locais de hostalaría, especialmente aqueles que contan con terrazas.
Lémbraselles que, segundo a ordenanza municipal, están obrigados a manter o seu mobiliario en bo estado, retiralo fóra do horario autorizado e, por suposto, manter limpas tanto as súas terrazas como os arredores.
Pero isto non é só cousa de bares e cafetarías: o coidado do espazo público é tarefa de todos.
Unha das maiores queixas cidadás segue sendo a falta de recollida de excrementos caninos ou os malos cheiros causados por ouriñes non tratados. Por iso, insístese tamén na responsabilidade individual, especialmente dos donos de mascotas, para manter limpa e agradable a cidade.
