Os médicos dos servizos de urxencias de todos os hospitais galegos protagonizaron actos de protesta este luns de forma simultánea. Ás 12.00 horas, profesionais de toda a comunidade concentráronse ás portas dos seus centros sanitarios para reclamar a convocatoria inmediata da comisión de seguimento do acordo de urxencias, un marco laboral que leva sen revisarse desde 2007 e que consideran claramente desfasado.
En Vilagarcía, a protesta contou co respaldo do persoal do Hospital do Salnés. A imaxe difundida polos propios facultativos, na que aparecen unidos e concentrados, incide en que a situación das urxencias hospitalarias chegou a un punto límite e esixe respostas urxentes.
Os médicos lembran que os servizos de urxencias son "a rede de seguridade final do sistema sanitario", o recurso ao que acoden os pacientes cando falla a Atención Primaria, se eternizan as listas de espera ou non hai alternativas asistenciais. "Somos o único servizo que funciona as 24 horas do día, o sete días da semana, e nunca pecha", subliñan. Con todo, denuncian que as súas condicións laborais permanecen conxeladas desde hai case dúas décadas e que, mesmo, quedaron fóra das melloras aprobadas polo Sergas en abril de 2023 para outros colectivos sanitarios.
Entre as principais reivindicacións figura a voluntariedade real da xornada complementaria. Os urxenciólogos aseguran que estas horas adicionais son obrigatorias de facto e reclaman que deixen de imporse, ao entender que a situación roza os límites do traballo forzoso. Tamén esixen a actualización dos complementos por atención urxente e por traballo por quendas, así como a equiparación dos pluses de noites de venres e festivos cos do resto do persoal sanitario.
Outro dos puntos fundamentais é a creación dun complemento de dispoñibilidade para cubrir baixas e ausencias imprevistas. A diferenza doutros ámbitos, como a PAC ou Enfermaría, os médicos de urxencias carecen dun sistema regrado e remunerado de localización, o que consideran unha clara desigualdade. "Non pedimos privilexios, pedimos igualdade", insisten.
Os facultativos reclaman ademais que o prezo da súa xornada complementaria se iguale ao das prolongacións de Atención Primaria, xa que o seu valor económico apenas se actualizou desde 2007. A isto suman a demanda dun crédito horario específico dentro da xornada para formación, docencia e investigación, unha carencia que, aseguran, dificulta a actualización constante que require unha especialidade orientada a salvar vidas en situacións críticas.
A situación dos profesionais maiores de 55 anos ocupa tamén un lugar destacado na protesta. Os urxenciólogos piden poder quedar exentos das noites sen perda salarial, mediante módulos diúrnos ou outras actividades, do mesmo xeito que ocorre con outros especialistas. Argumentan que o traballo nocturno ten un impacto directo na saúde e que o sistema debería apostar por reter a experiencia, non por expulsala.
Por último, os médicos esixen que a comisión de seguimento do acordo de urxencias se reuna polo menos unha vez ao ano e revise periodicamente os plans funcionais. "De nada serven os acordos se quedan en papel mollado", advirten. Con estas concentracións, a colectivo busca que a administración sanitaria escoite unhas demandas que consideran esenciais para garantir tanto a calidade asistencial como a sustentabilidade dos servizos de urxencias en Galicia.