O Portal de Contratos de Galicia acaba de anunciar unha importante licitación, valorada en 1.693.758 euros, destinada a mellorar o diagnóstico do cancro de mama en varios hospitais do Servizo Galego de Saúde, incluído o Hospital Montecelo.
Con esta iniciativa, búscase reforzar a atención sanitaria a todas as mulleres galegas, dotando aos centros hospitalarios de equipos de última xeración para a realización de mamografías e o seguimento clínico dos casos.
Os novos dispositivos incorporarán tecnoloxía de imaxe dixital de alta resolución e tomosíntese 3D, unha técnica que mellora notablemente a detección do cancro ao reducir a superposición de tecidos.
Isto non só permite identificar mellor posibles anomalías, senón que tamén diminúe a necesidade de realizar biopsias innecesarias.
Ademais, estes equipos contarán con funcións avanzadas como imaxes sintetizadas sen aumento da dose de radiación e a posibilidade de realizar mamografías con contraste, o que reduce a necesidade de probas adicionais como as resonancias magnéticas.
Tamén se inclúen sistemas de guiado para biopsias en 2D, 3D e con contraste, así como estacións de revisión con software de apoio para facilitar o traballo dos especialistas.
O contrato terá unha duración de dous meses a partir da súa formalización, e as empresas interesadas en participar nesta licitación poderán presentar as súas propostas até o 8 de setembro.
Un investimento crave para seguir avanzando na prevención e detección precoz do cancro de mama en Galicia.