Noites Abertas recupera cifras de participación pre pandemia no seu 25 aniversario

Pontevedra
21 de abril 2024

Neste ano 2024, 2.516 persoas participaron nalgunha das 137 actividades propostas, que contaron con 148 monitores e monitoras. A dirección de Noites Abertas mantivo unha xuntanza co edil de Xuventude, Demetrio Gómez, para avaliar esta última edición do programa, que se desenvolveu "sen incidentes reseñables" e resultou un "éxito"

Presentación de Noites Abertas 2024
Presentación de Noites Abertas 2024 / Mónica Patxot

A última edición do programa municipal Noites Abertas resultou un "éxito" e supuxo recuperar as cifras de usuarios previas á pandemia da covid 19 e mesmo superar a ratio de persoas por actividade. Neste ano 2024, 2.516 persoas participaron nalgunha das 137 actividades propostas, que contaron con 148 monitores e monitoras.

A dirección de Noites Abertas mantivo unha xuntanza co edil de Xuventude, Demetrio Gómez, para avaliar esta última edición do programa, na que o programa municipal cumpriu 25 anos ofrecendo actividades alternativas de ocio para a mocidade de Pontevedra.

Despois desa reunión, o Concello destacou que Noites Abertas 2024 se desenvolveu "sen incidentes reseñables" e que resultou un "éxito", pois máis do 95 % das actividades programadas contaron coa presenza da mocidade durante a súa celebración.

Segundo o balance municipal,  neste edición despegou o Local de Música, no que se cubriron todas as prazas que se ofreceron.

As actividades libres e de lecer alternativo, como badminton libre, tenis de mesa libre ou o Espazo Aberto, funcionaron "de maneira excelente" como espazos seguros e diversos, consolidándose entre a mocidade de Pontevedra.

A dirección de Noites Abertas tamén destaca que este é un "programa máis que asumido por toda a mocidade pontevedresa", que sabe da súa existencia, que o valora, e que ven neste un carácter non discriminatorio, unha presenza equilibrada de xénero e unha asistencia uniforme ao longo de todas as xornadas.

A xuntanza de avaliación tamén permitiu realizaron propostas de mellora. Propoñen a actualización de formación en igualdade para "acadar un nivel aínda máis alto" e traballar en eidos como a mecanización oral da linguaxe igualitaria e non sexista.

Ademais, debateuse a posibilidade de retirar ao público das actividades de fútbol para manter ese espazo seguro e reservado para as persoas de idade de Noites Abertas.

En nome do programa Noites Abertas, os seus responsables expresaron o seu "máis sincero agradecemento" a todas as persoas que formaron parte desta emblemática 25 edición. "É un privilexio contar coa vosa participación, dedicación, ilusión, profesionalidade e entusiasmo. Vós fixestes posible non só o éxito deste edición, senón tamén a continuidade e o crecemento deste proxecto ao longo dun cuarto de século. A vosa contribución a Noites Abertas é inestimable", sinala a dirección.