A coñecida como variante oeste de Caldas de Reis, deseñada para reducir o tráfico que atravesa o centro urbano da localidade, xa ten trazado.
O Ministerio de Transportes e Mobilidade Sostible aprobou provisionalmente unha das quince alternativas que se estudaron e decidiu sometela a exposición pública.
O trazado elixido une polo suroeste o enlace de Baión, na estrada N-640, co enlace de Caldas Sur, na N-550, cunha lonxitude aproximada de 8 quilómetros.
Esta alternativa comeza en Baión, separándose da N-640 cara ao sur para evitar o paso polo núcleo de Godos (Caldas), tras o que se apoia de novo na actual N-640.
Antes do cruzamento coa antiga liña ferroviaria, hoxe reconvertida en vía verde, sepárase de novo da estrada e sitúase no novo enlace de Godos para conectar coa autoestrada AP-9 a través da actual N-640.
Posteriormente, o trazado viraría cara ao sur cruzando nun viaduto de 215 metros o río Cardín e discorre a partir deste punto a media ladeira sobre o monte do Cotiño.
A continuación, outro viaduto de 425 metros atravesará o río Umia tras o cal apóiase a media ladeira nos montes de Paradela cun trazado similar ao do antigo ferrocarril nesa zona para atravesar despois a chaira fluvial do río Chaín, cun viaduto de 420 metros.
Superado este viaduto, proxéctase a semi ligazón coa rolda oeste para, a continuación, unha vez salvado o Camiño de Santiago cun paso sobre o mesmo e mediante o viaduto de Tivo, de 140 metros, conectar co enlace sur da variante este da N-550.
Transportes indica que esta ligazón dará continuidade ao trazado este-oeste e permitirá todos os movementos pola zona.
Esta actuación completarase cun viario duns 930 metros a modo de rolda que conecta coa N-550 na glorieta de Tivo.
Este viario disporá dunha conexión a nivel en forma de glorieta coa estrada provincial EP-8004, para a continuación cruzar cun viaduto de 200 metros o río Umia e alcanzar a N-640 á altura do polígono das Veigas de Almorzar mediante unha nova glorieta.
No tramo entre a EP-8004 e N-640 habilitarase tamén unha senda mixta peonil ciclista asociada á traza, que atravesa o río Umia pola ponte proxectada.
Para completar a conexión direccional da rolda coa variante, o proxecto construirá unha glorieta adicional sobre a EP-8004, ao sur do tronco da variante constituíndo, xunto coa outra glorieta, un enlace direccional cara ao sur.
O obxectivo desta nova variante, segundo o Ministerio de Transportes, é reducir os tráficos de tránsito que atravesan o núcleo urbano Caldas pola N-550 ou a N-640 e mellorar a accesibilidade á AP-9 desde a N-640 e os núcleos de Caldas de Reis e de Vilagarcía de Arousa.
Ademais, o proxecto pretende eliminar os puntos de elevada accidentalidade na contorna da travesía de Godos e mellorar o trazado da N-640.
Desta maneira, sosteñen desde o departamento que dirixe Óscar Puente, conseguirase crear un corredor continuo con características homoxéneas e velocidades de deseño adecuadas, con limitación de accesos e sen conexións a nivel entre Vilagarcía e Caldas de Reis.