A undécima edición da Festa do Jato de Portonovo xa ten data. Será o sábado 21 de febreiro.
Así o confirmou a Asociación Rúa dos Viños de Portonovo, o colectivo que organiza unha cita que se consolidou como unha das festas máis divertidas do inverno en todo O Salnés.
A festa volverá encher as rúas de Portonovo de ambiente, participación e diversión, con centos de persoas disfrazadas de gatos e os seus traxes ou camisetas raxadas.
Un ano máis, non faltarán algunhas das súas actividades máis emblemáticas, como a popular carreira "Os jatos atrás dos ratos", o xa tradicional concurso de disfraces e a música por toda a rúa.
A organización traballa xa na programación completa da festa, que irá desvelando progresivamente a través das súas redes sociais.
A Festa do Jato converteuse cos anos nunha festa popular, familiar e moi arraigada, que atrae a miles de persoas tanto da comarca como doutros puntos de Galicia e de España.
Desde a organización animan a participar destes festexos e a colaborar para seguir facendo crecer a festa ano tras ano.