Beatriz Pilar e Alba Tamara eran dúas nenas que gozaron dunha feliz infancia xunto a mamina e papino...un idílico conto? si, e tamén o inicio do relato da protagonista desta Playlist de PontevedraViva Radio. A actriz Bea Campos é unha muller brava que deixou na súa adolescencia San Xurxo de Sacos para trasladarse coa súa familia a Monte Porreiro. Unha todoterreo que encandea cos seus relatos cal Hamelin coa súa frauta.
Mamó a animación infantil dos seus pais: Migallas Teatro e a literatura infantil de Kalandraka e a súa defensora Manuela. Por un comentario do seu papino estudou Turismo. Non foi prolongada esa experiencia profesional, pero chegou a meter a un grupo de turistas na Catedral compostelá por unha tenda de souvenirs convencéndoos de que aquela era a verdadeira Porta Santa.
Compaxinando co traballo estudou na Escola Superior de Arte Dramática de Vigo e entra en contacto con máis profesionais da escena. Nunha xira por Latinoamérica lembra unha "secuencia" case de traxicomedia. Como coñeceu ao tío Carlos, o irmán xemelgo do seu avó. O paso do tempo engadiu ao seu currículo máis compañías de teatro, unha web serie, o paso por televisión, a súa faceta de monologuista,...de onde saca o tempo para todo é inexplicable.
Atópase nun dos grandes momentos da súa vida: "teño a sensación de ser feliz" afirma. Que mellor final para este relato?.