A Oficina de Turismo municipal de Pontevedra atendeu a máis de 37.000 visitantes entre os meses de xuño e agosto, o que supón un aumento do 6,7% respecto ao verán de 2024.
Neste período, o turismo nacional foi o gran protagonista. Case oito de cada dez persoas que solicitaron información turística proviñeron doutras comunidades españolas, con Madrid, Andalucía e Cataluña sendo os visitantes máis numerosos.
Entre os estranxeiros destacaron portugueses, franceses e italianos, seguidos por arxentinos, británicos e estadounidenses.
A afluencia de turistas encheu rúas, prazas e espazos verdes durante o mes de agosto, impulsada polo atractivo da axenda lúdica e cultural como as festas, concertos, exposicións, feiras e actividades deportivas.
Moitos visitantes buscaron alternativas recreativas e saudables nas rutas de natureza, un fenómeno que se reforzou ante as ondas de calor e que se traduciu nun marcado interese polos espazos naturais da cidade, segundo as consultas atendidas na Oficina Municipal de Turismo.
A demanda de información sobre patrimonio, monumentos, visitas guiadas e vida urbana tamén foi moi significativa.
Doutra banda, a Oficina de Turismo municipal, que recolle só os datos de quen solicitan información, converteuse nun punto de información de referencia local, atendo en agosto a un total de 1.800 veciños, o que supón un 68% máis que o ano anterior.
A programación de visitas guiadas municipais continúa activa até o 30 de setembro, con saídas diarias desde a oficina de turismo (Praza de España s/n), identificadas por un paraugas verde.
As rutas, de aproximadamente 1 hora e 45 minutos, poden reservarse online ou no propio punto de información, con prezos a partir de 7 euros e descontos para colectivos específicos. Os menores de 12 anos acceden gratuitamente.