O Concello de Poio deu comezo ás obras para a construción dun muro de contención e a mellora do firme no Camiño do Souto, situado en Combarro.
Esta intervención responde a unha demanda histórica dos residentes da zona, que levaban anos alertando do deterioro do camiño e do perigo que supoñía tanto para vehículos como para peóns.
O concelleiro de Obras de Servizos, Marcial García, explicou que a actuación busca solucionar os problemas de seguridade viaria que viña presentando este vial.
"Entre a auga, a falta de elementos de contención, o deterioro do firme e o peso dos coches, a situación era preocupante", afirmou García.
O proxecto, financiado con fondos do plan +Provincia da Deputación, inclúe a mellora do firme, escavación en desmonte, preparación do terreo e escavación mecánica de toxo para a cimentación do muro de contención.
Ademais, o goberno local negociou coa propiedade da parcela para poder realizar o muro e ampliar o vial cunha alineación a catro metros do eixe.
As obras tamén contemplan a roza das beiravías, a limpeza da vexetación existente e a instalación de sinalización horizontal e vertical para incrementar a seguridade.
O Camiño do Souto é unha vía moi transitada que conecta Combarro, O Xuviño e Cidrás, e que se ve especialmente afectada polo caudal de auga durante o inverno.
Marcial García destacou que este ano Poio está a empregar fondos provinciais para atender melloras en camiños rurais que levan anos agardando mantemento.
"Son pequenos investimentos pero moi necesarios, que ofrecerán un servizo fundamental para a nosa veciñanza", subliñou.
Ademais do Camiño do Souto, o Concello de Poio está a realizar obras no camiño do Cemiterio e na travesía Poio de Arriba, centradas na substitución do firme e mellora da seguridade.
Tamén se están executando traballos na rúa Costa de Arriba, en Combarro, onde se mellora o firme e se amplía a rede de abastecemento e pluviais.