As persoas con Trastorno do Espectro Autista (TEA) poderán gozar plenamente das Festas de San Xoán de Poio grazas á iniciativa do Concello de silenciar as atraccións de feira durante dúas horas diarias.
Esta medida, que se aplicará entre as 18:00 e as 20:00 horas en todos os días de celebración, permitirá que as persoas con hipersensibilidade auditiva accedan ás barracas e máquinas recreativas nun ambiente adaptado ás súas necesidades.
A iniciativa, promovida pola concellería de Festexos, busca eliminar unha importante barreira para este colectivo, xa que os ruídos fortes poden afectarlles de forma moito máis intensa e impedirlle gozar das actividades festivas.
O compromiso acadouse tras negociacións entre o goberno local e os feirantes, co obxectivo de garantir unhas festas verdadeiramente inclusivas.
O Concello tamén tomou outras medidas para minimizar o impacto acústico, como anunciar con antelación nas súas redes sociais os horarios da pirotecnia programada.
Os fogos de artificio están previstos para o luns 23 ás 12:00 horas desde A Seca, mentres que os días 24, 25 e 26 serán ás 13:00 horas, cunha duración aproximada de 15 minutos. Ademais, na noite do 26, á medianoite, haberá un espectáculo de fogos de lucería de 20 minutos de duración.
Ante a previsión de milleiros de asistentes durante os seis días de celebración, este xoves desenvolveuse a mesa de coordinación do dispositivo especial de seguridade. Nesta xuntanza, ademais de coordinar os corpos participantes no operativo, revisouse a sinalización dos aparcadoiros e a organización do Punto Lila.
O espazo contra as violencias machistas instalarase na Seca o día 25 de xuño, coincidindo coa verbena das orquestras París de Noia e Os Satélites. Funcionará desde as 22:00 ata as 3:00 horas e estará atendido por dúas promotoras de igualdade.
O Punto Lila servirá tanto como centro de información sobre a violencia machista como espazo seguro para as posibles vítimas de agresións, activando o protocolo de actuación coas forzas de seguridade cando sexa necesario.