A sanxenxina Sandra Piñeiro será distinguida este ano coa Cebola de Ouro, que concede o Concello de Sanxenxo. A entrega terá lugar o próximo 4 de setembro durante a celebración das festas de Santa Rosalía e da tradicional Festa da Cebola.
O anuncio foi realizado este luns polo goberno local tras un acto celebrado no Salón de Plenos municipal. A proposta partiu do alcalde, Telmo Martín, e recibiu o respaldo dos asistentes a unha recepción que reuniu a representantes da Corporación, familiares, amizades e veciños.
Aínda que naceu en Sanxenxo, Piñeiro desenvolveu gran parte da súa traxectoria pública na Comunidade Valenciana. Na actualidade traballa na área de Turismo do Concello de Ayora, localidade desde a que chegou a Galicia unha iniciativa solidaria promovida por un dos seus compañeiros de corporación.
O concelleiro de Deportes de Ayora, José Luís Martínez, completou recentemente unha travesía ciclista de máis de mil quilómetros para render homenaxe a Piñeiro e, ao mesmo tempo, recadar fondos destinados á investigación contra o cancro.
O percorrido, que uniu Ayora e Sanxenxo, desenvolveuse en oito etapas e concluíu o pasado 6 de xuño.
A iniciativa naceu como mostra de apoio a Piñeiro tras o diagnóstico da enfermidade. Á súa chegada a Sanxenxo, Martínez foi recibido oficialmente no consistorio, onde explicou os obxectivos dunha acción que serviu tanto para visibilizar a loita contra o cancro como para obter recursos económicos destinados á investigación.
Durante o acto, o rexedor sanxenxino animou á cidadanía a colaborar coa causa mediante achegas solidarias e aproveitou a ocasión para propor que Piñeiro fose a homenaxeada desta edición da Cebola de Ouro.
Con esta distinción, Sanxenxo recoñece tanto a traxectoria de servizo público desenvolvida pola galardoada como a súa fortaleza persoal fronte á enfermidade, converténdoa nunha das protagonistas das próximas celebracións patronais.