Transición Ecolóxica colaborará con Pontevedra na recuperación do seu litoral

Pontevedra
21 de febreiro 2024

Entre ambas as partes, segundo explicou Fernández Lores ao termo da reunión con Teresa Ribera, existe unha "coincidencia clara" na necesidade de recuperar os espazos marítimo-terrestres de Pontevedra, algo no que colaborarán ambas as administracións

Entrevista de Fernández Lores coa ministra para a Transición Ecolóxica, Teresa Ribera
Entrevista de Fernández Lores coa ministra para a Transición Ecolóxica, Teresa Ribera / Ministerio para la Transición Ecológica

Unha reunión "agradable e operativa" aínda que sen acordos concretos. Polo menos, por agora. Así foi o encontro que mantiveron este mércores o alcalde de Pontevedra, Miguel Anxo Fernández Lores, e a ministra para a Transición Ecolóxica, Teresa Ribera, en Madrid.

Entre ambas as partes, segundo explicou Fernández Lores ao termo da reunión, existe unha "coincidencia clara" na necesidade de recuperar os espazos marítimo-terrestres de Pontevedra, algo no que colaborarán ambas as administracións.

"Teño que dicir que coincidimos en varios dos proxectos de recuperación e agora veremos cales están máis maduros e que administración pode facerse cargo deles ou que vías de colaboración se poden establecer", indicou o alcalde pontevedrés.

No repaso que Lores e Ribera realizaron polos diversos proxectos que o Concello ten en carteira en relación co seu litoral tamén interveu a directora xeral da Costa e o Mar, Ana Oñoro, e o edil pontevedrés César Mosquera.

As dúas administracións emprazáronse para continuar estudando os diferentes proxectos recuperación e renaturalización "que hai sobre a mesa", explicou Lores, que avanzou que haberá unha nova reunión para concretalos, esta vez xa en Pontevedra.

Será a directora xeral da Costa e o Mar a que acuda a Pontevedra, nunha data que non foi fixada aínda para "para comprobar in situ" as distintas posibilidades de actuación

Esta reunión, segundo o alcalde, terá un "carácter máis práctico" e confía en que "será pronto".