Vilaboa acende o Nadal con ilusión e chocolate en Paredes

A parroquia de Paredes, no municipio de Vilaboa, deu este venres o pistoletazo de saída ás festas de Nadal cun evento cheo de luz, música, sabor e, sobre todo, moita ilusión.

O acendido das luces na Carretera Vella converteuse nunha auténtica celebración comunitaria organizada pola Asociación Veciñal e Cultural Carretera Vella Paredes, que logrou congregar a máis de 300 persoas nunha noite divertida.

O acto comezou cun pregón de luxo a cargo do escritor Manuel Lourenzo González, quen sorprendeu a veciñanza cun relato divertido e imaxinativo que arrancou sorrisos e aplausos.

A música do grupo de gaitas A Canteira puxo a banda sonora perfecta para unha noite que tamén contou cun espectáculo de fogos de artificio que iluminou o ceo de Paredes.

Repartíronse arredor de 60 litros de chocolate quente con rosca entre o público asistente.

Mesmo hai quen fala da presenza dun misterioso Grinch saíndo dunha casa en ruínas que asusta aos cativos e ao que non se pode sacar fotos.

O alcalde de Vilaboa, César Poza, destacou a implicación da veciñanza neste comezo das festas, subliñando o espírito de unión que caracteriza ao municipio.

Pero o Nadal en Vilaboa non se detén aquí. Este sábado 30 de novembro, a festa trasladarase a Santa Cristina e Figueirido.

En Santa Cristina, o acendido das luces está programado para as 19:00 horas e contará cunha montaxe especial elaborada grazas ao traballo de máis de vinte voluntarios.

A banda da Escola de Música de Vilaboa será a encargada de poñer o toque musical.

Por outra banda, Figueirido sorprenderá a partir das 20:00 horas cunha espectacular árbore de Nadal de máis de 20 metros de altura feita con palés, unha mostra de creatividade e esforzo colectivo. A música non faltará coa sesión dun DJ.