A situación epidemiolóxica complicouse nos últimos días en Vilanova de Arousa, que o venres ten 37 casos activos de covid-19 tras sumar dous na última xornada. Para intentar atallar este avance do virus, o subcomité clínico que asesora á Xunta de Galicia na xestión da pandemia decidiu que o municipio pase a ter as máximas restricións.
O subcomité acordou na súa reunión deste venres que estas máximas restricións tamén se manteñan no municipio do Grove, que xa leva varias semanas con estas medidas activadas.
En toda Galicia está activo o nivel máximo de restricións nos concellos de Carballeda de Valdeorras, Cualedro, A Pobra do Caramiñal, O Grove, e Vilanova de Arousa, estes dous últimos na área sanitaria de Pontevedra e O Salnés.
O nivel máximo activarase en Vilanova ás 00,00 horas do vindeiro luns 26 de abril e implicará o peche perimetral do municipio e que só se poida entrar e saír do mesmo por causas xustificadas. Ademais, a hostalería deberá permanecer pechada.
O subcomité tamén determinou outros cambios que afectan á área sanitaria. Pasa ao nivel alto Meis e mantéñense como ata agora nesta situación Meaño, Ribadumia e Marín. O municipio marinense experimentou este venres un incremento significativo de casos activos e pasa a 82, 11 máis que o xoves.
No resto de Galicia tamén se aplican estas medidas de risco alto nos concellos de Lobeira, Muiños, Petín, O Barco de Valdeorras, Meira, Trabada, Barreiros, Ribeira, Cambre e Ponteareas
Ademais, hai cambios no nivel medio, que pasa a aplicarse tamén a Poio. Continúan neste nivel Cambados, Catoira, Vilagarcía de Arousa, A Illa e Sanxenxo e incorpórase o municipio poiense, que este venres ten 23 casos activos, dous máis que o xoves.
No resto de Galicia, as medidas do nivel medio rexerán nos concellos de Cartelle, Lobios, Cortegada, Padrenda, Verín, Chantada, Boiro, Rianxo, Carnota, Carral, Cangas, Gondomar e Vigo
No resto dos concellos, estarán vixentes as restricións fixadas no nivel medio baixo.