Sangre Fucsia #161
Lun | 19:00 | 20:10
Neste programa achegámonos ao país veciño Marrocos, para tentar coñecer un pouco máis de preto os feminismos de alí. Para iso entrevistamos a Omnia Nur, membro activa do movemento 20F e da Asociación Marroquí de Dereitos Humanos, quen nos poñe ao día sobre a actualidade do movemento no país, e con quen charlamos acerca doutros temas como a recente lei aprobada de loita contra a Violencia de Xénero, o conflito do Sahara ou os colectivos LGTBI+ do país.
Tamén repasamos a historia xeral do movemento de mulleres para coñecer que a institución de ensino superior máis antiga do mundo atópase en Marrocos. Esta foi fundada por Fátima al- Fihri e a súa irmá Mariam, e hoxe coñécella como Universidade de Qarawiyyin. Falamos tamén do gran cabalo de batalla do feminismo en Marrocos, o Código de Familia que entrou en vigor en 1958, chamado Mudawana. Nel, referendábase legalmente a subordinación das mulleres en temas como o matrimonio, a custodia dos fillos ou o divorcio. En 1992, a Unión de Acción Feminista liderou unha campaña que recolleu máis dun millón de firmas solicitando a derrogación da Mudawana co argumento de que este código estaba en contradición coa Constitución, que proclama a igualdade formal de toda a poboación. Como consecuencia deste activismo feminista, a Mudawana reformouse parcialmente en 2004.
Ademais, coñecemos a algunhas das protagonistas máis importante do movemento, como Fatima Mernissi, Ibtissam Betty Lachgar ou Saïda Menebhi. Por último, terminamos repasando algúns do cómic máis destacado do outro lado do Estreito, para constatar que neles a realidade social, política e cultural da zona árabe son as protagonistas. Sabías que o primeiro cómic en lingua árabe publicado en Marrocos data de 1950, tiña vinte páxinas, descoñécese o autor ou autora e chamábase “El halcón del desierto”?
Playlist: Soultana – Sawt Nssa; Cheba Maria – Celibataire; Rajae El Mouhandiz – Habibi Freak on; Sophia Charaï – Pichu Pichu; Oum – Wali; Lauma – Njoum Lil.