Na semana dedicada á muller e á celebración do 8 M, o Cara a cara de PontevedraViva Radio saíu a vivir in situ un encontro de mulleres columnistas con intención reivindicativa, celebrado en Pontevedra os pasados 2 e 3 de marzo.
Neste Cara a Cara, que cumpre o seu programa número cen, contamos con "Mulleres que opinan", un espazo no que entrevistamos a algunhas das xornalistas e columnistas ponentes no encontro celebrado hai uns días no Teatro Principal, "As mulleres que opinan son perigosas".
Máis de 200 persoas, entre as que se atopaban numerosos profesionais de distintos medios de comunicación asistiron ao evento, que naceu como resposta á celebración do Congreso Nacional de Columnistas de León, cita á que non foi convocada ningunha muller.
As ponentes Ana I. Bernal, María Varela e Diana López compartían connosco a súa visión sobre o mundo do xornalismo de opinión e as súas experiencias como xornalistas, columnistas, locutoras, profesoras, entre outras, nun mundo que parece dominado aínda polo xénero masculino.