Invasión extrarrestre na Escola Infantil do campus de Pontevedra
Por Mónica Patxot
Os extraterrestres tomaron o campus de Pontevedra. Alieníxenas de dous e tres anos camparon ás súas anchas este martes pola Escola Infantil, á que acoden principalmente os fillos de alumnos, profesores e persoal de servizo da Universidade de Vigo. Pero tranquilos, todo formaba parte da festa do entroido organizada no centro, aproveitando a coincidencia con estas datas festivas.
O centro, situado nas inmediacións da Facultade de Ciencias da Educación, celebrou este martes un evento no que tanto os nenos e nenas como os seus profesores e cuidadores disfrazáronse como extraterrestres con traxes que eles mesmos estiveron elaborando na escola durante os últimos días. Para facelos, principalmente, reutilizaron bolsas de lixo negras que se converteron nos seus disfraces.
Como verdadeiros alieníxenas, os nenos, vestidos con camisetas, xerseis, polos, pantalóns, medias ou saias de cor verde, completaron o seu disfraz decorando as bolsas de lixo con estrelas e planetas dourados e colocando dúas antenas sobre a súa cabeza.
Foi o broche de ouro a todo un mes na que a celebración do Entroido foi a temática cultural sobre a que traballaron no aula.