Lores: "é criticable que se chegara aos suicidios para tomar medidas contra os desafiuzamentos"
Por Anxo Lourido
Pontevedra contará cunha oficina de asesoramento a persoas que poidan estar pendentes de desafiuzamentos. O Alcalde de Pontevedra, Miguel Fernández Lores, anunciou que a próxima semana teñen previsto asinar un convenio para poder establecer esa oficina cuxo principal obxectivo sería facilitar solucións xurídicas para os afectados por este tema.
O Alcalde de Pontevedra indicou que "o criticable é que se tivera que chegar aos suicidios para que se tomasen medidas e, inda por riba, insuficientes".
Tras coñecer a noticia dun novo suicidio en Córdoba como consecuencia dun desafiuzamento, o rexedor sinalou que o tema da vivenda é fundamental para os cidadáns e non se poden poñer este tipo de "parches" lexislativos e apuntou a que el é partidario de que as hipotecas se convertan nun arrendamento con posibilidades de recompra.