Tomeza espanta o mal de ollo
Por Mónica Patxot
A parroquia de Tomeza celebrou este Luns de Pascua, a tradicional romaxe de San Cibrán. A pesar de que a afluencia de persoas segue minguando, mantense un bo número de romeiros que se achegan ata a ermida no cume do monte de Lusquiños, para rezarlle ao santo e evitar o meigallo.
Os devotos teñen que cumprir co rito de dar nove voltas tirando de costas outras tantas pedriñas ao tellado e a continuación pasar tres veces por debaixo da imaxe do santo exposto fóra da capela solicitándolle os seus favores.
Dúas cousas cambiaron respecto antano: os romeiros xa non soben a pé polo monte ata a capela, nin as cuadrillas de mozos pasan a noite en tendas de campaña, nin se lanzan aqueles pedrolos que nalgunhas ocasións acaban golpeando as cabezas dos devotos. Agora acódese en coche e lánzanse unhas pequenas chinitas para escorrentar o mal de ollo.
Para completar o rito, logo de pagamento da vontade, os visitantes poden levarse para as súas casas un ramallete, composto por ramas de oliveira, loureiro ou romeiro.