Deteñen un vilagarcián que trapicheaba nas inmediacións do Centro de Atención a Drogodependentes
Por Aitana Vidal & Oskar Viéitez
As queixas e denuncias por parte de veciños e comerciantes das inmediacións do Centro de Atención a Drogodependentes de Vilagarcía eran frecuentes ante os altercados, trapicheo e pelexas entre os usuarios deste servizo, polo que a Comisaría Local de Vilagarcía de Arousa tiña clasificado este ámbito como un "punto negro" de venda de drogas ao miudo.
Coa intención de erradicar este foco de delincuencia púxose en marcha un dispositivo especial que o pasado día 18, levou á detención dun home, de 56 anos de idade, veciño de Vilagarcía, como presunto autor dun delicto contra a saúde pública.
Segundo fontes oficiais da Comisaría vilagarciana, os axentes observaron varios intercambios de heroína polo que procederon á detención do presunto vendedor da droga, sendo trasladado a dependencias policiais, onde permaneceu detido ata a súa posta a disposición do Xulgado de Instrución Número tres de Vilagarcía, en funcións de garda.
Dáse a circunstancia que este individuo conta con varias detencións, dúas delas por delitos contra a saúde pública.