Deteñen tres persoas por roubar carteiras durante a Festa do Lacón en Cuntis
Por Redacción
A Garda Civil detivo tres persoas, veciños de Carballo, como presuntos autores dun delito continuado de furto en Cuntis.
Trátase dun home de 40 anos de idade e dúas mulleres, de 23 e 32 anos, que terían cometido os citados delitos durante a celebración da Festa do Lacón o pasado domingo 22 de febreiro.
No marco do operativo activado pola celebración da festa, composto por efectivos de Protección Civil e axentes da Unidade de Seguridade Cidadá da Garda Civil (USECIC), procedeuse á detención dos supostos autores do furto de cinco carteiras e de tres pares de pendentes do interior dun bolso.
Os axentes recuperaron a totalidade do diñeiro (212 euros) e os pendentes substraídos.
Os detidos, que contan con antecedentes policiais, foron entregados ao Xulgado de Intrucción 2 de Caldas de Reis, quedando en liberdade con cargos.