O TSXG tomba a prórroga da autorización ambiental de Elnosa e confirma a de ENCE
Por Natalia Puga
A actualidade do complexo industrial Ence-Elnosa en Lourizán volve pasar polos tribunais. Este mércores saíron á luz dúas sentenzas do Tribunal Superior de Xustiza de Galicia (TSXG) que outorgan unha sorte dispar a ambas as dúas empresas ao fío da renovación da autorización ambiental integrada (AAI) concedida pola Xunta de Galicia. O tribunal anula a prórroga de Elnosa, pero referenda a de Ence.
As dúas sentenzas resolven recursos contencioso-administrativos interpostos polo Concello de Pontevedra ás AAI prorrogadas pola Xunta no ano 2011. No caso de Elnosa, o TSXG estima o recurso e anula a renovación da autorización por considerar que é "contraria a dereito". No caso de Ence, a demanda foi desestimada "por non concorrer vicios de entidade abondo para declarar a nulidade ou anulabilidade da resolución impugnada".
O concelleiro de Infraestruturas de Pontevedra, César Mosquera, deu a coñecer ambas as dúas sentenzas este mércores nunha comparecencia pública na que xa anunciou que o Concello recorrerá a sentenza relativa a ENCE ante o Tribunal Supremo. Móstrase convencido de que a resolución final, tras este recurso, "vai ter o mesmo destino que a de Elnosa, que vai ser anulada a AAI".
A pesar de que o TSXG lle quita a razón ao Concello e lla dá á Consellería de Medio Ambiente e a Ence, Mosquera considera que os argumentos xurídicos utilizados son susceptibles de ser recorridos porque, entre outros argumentos, se basea en que o Plan e Proxecto Sectorial de Incidencia Supramunicipal (PSIS) da pastera segue en vigor cando foi declarado nulo por unha sentenza do Tribunal Supremo.
Ence valora que recurso que presentou o Concello á AAI forma parte dunha "estratexia para a obtención de votos" por parte do BNG
Ence ve unha boa noticia nesta resolución e valora que esta sentenza demostra que a empresa "estivo do lado da verdade" nas súas alegacións ao procedemento e considera "insuficiente" o informe sobre compatibilidade urbanística emitido polo Concello para vetar ou impedir a AAI. Na súa opinión, o recurso que presentou o Concello de Pontevedra á AAI forma parte dunha "estratexia para a obtención de votos" por parte da formación política que lidera o Goberno Local, isto é, o BNG.
Ence insiste en que a sentenza confirma que os argumentos usados neste caso "eran inválidos". Como exemplo deses argumentos inacertados recorda a referencia que fan ao Proxecto Sectorial de Incidencia Supramunicipal: a día de hoxe, co PSIS vixente," decaerían ademais os argumentos do Concello. Outro punto no que ve que o Concello non acerta cos seus argumentos é todo o relativo ás Directrices de Ordenación do Territorio e ao Plan de Ordenación do Litoral, pois non se alcanza a enxergar en que sentido as súas disposicións supoñen un argumento a favor das teses demandantes".
Dende a empresa interpretan que o texto xurídico sinala que o Concello tamén se equivoca ao introducir neste recurso ao expediente de caducidade da concesión para a permanencia da pastera en Lourizán máis alá de 2018, pois recolle que "é alleo a este proceso". Malia as súas discrepancias co Concello, Ence quere insistir en que quere poñerse a disposición das administracións públicas, comezando polas autoridades municipais de Marín e Pontevedra, para colaborar no impulso á xeración de riqueza e emprego na bisbarra e recorda que está aberto ao diálogo.
Relacionadas:
-
O Supremo desestima o recurso de casación de Elnosa para evitar o seu cesamento de actividade
Por Diego Espiño |
-
Ethel Vázquez asegura aos traballadores de Elnosa que contribuirá a "conservar os postos de traballo"
Por Redacción |
-
Os traballadores de Elnosa esixen o mesmo trato que os de ENCE
Por Oskar Viéitez & Mónica Patxot |
-
Ciudadanos respalda que ENCE siga na Ría se cumpre con todos os parámetros ambientais
Por Redacción |
-
Mosquera asegura que o PP ultima "regalar" a ENCE a súa continuidade na Ría a cambio de "algún millonciño"
Por Alejandro Espiño |
-
ENCE presume da derrota da APDR nos tribunais por segunda vez en tres anos
Por Redacción |
-
A APDR recorre a actualización das autorizacións ambientais de Ence e Elnosa
Por Redacción |
-
A APDR denunciará á Xunta no caso de que prorrogue a autorización ambiental de Elnosa
Por Redacción |