O Liceo Casino, sede dun simposio internacional sobre proteínas vexetais
Por Redacción
Preto de 150 científicos de 30 países daranse cita os días 5, 6 e 7 de maio no Liceo Casino de Pontevedra no simposio internacional "Proteínas vexetais para o futuro".
Trátase dunhas xornadas que están promovidas pola European Association for Research on Plant Breeding (EUCARPIA), o Centro Superior de Investigacións Científicas (CSIC) e a Asociación Española de Leguminosas (AEL).
Ao encontro acudirán xenetistas, melloradores de plantas, agrónomos e especialistas en nutrición de diferentes países para abordar o déficit de proteínas vexetais en Europa e propoñer accións para fomentar o seu cultivo e o seu consumo.
Entre outras autoridades destaca a presenza do presidente do CSIC, Emilio Lora-Tamayo, ou o catedrático da USC Ángel Carracedo, que ofrecerá a conferencia inaugural.
Colaboran co simposio a Estación Fitopatolóxica do Areeiro, a Sociedade Española de Fixación do Nitróxeno ou o Departamento de Produción Vexetal da Universidade de Santiago de Compostela.