O Porto de Vilagarcía pecha 2012 movendo máis dun millón de toneladas de mercancía
Por Redacción
A Autoridade Portuaria de Vilagarcía termina o ano 2012 recuperando a cifra do millón de toneladas movidas, un feito que non se producía desde o ano 2008. Así llo comunicou a presidenta da Autoridade Portuaria, Sagrario Franco, aos membros do Consello de Administración do Porto na última sesión do ano.
A falta duns días para concluír este exercicio, polos peiraos vilagarcianos pasaron un total de 1.004.333 toneladas de mercancía, cifra que se incrementará ligeramente durante o fin de semana. O aumento de tráficos con respecto ao pasado ano é de case o 24%, xa que 2011 terminou cun movemento total de mercancías de 811.216 toneladas.
Un aspecto destacable é que se consolida o cambio histórico no reparto de tráficos portuarios que xa se rexistraba o peche do primeiro semestre, xa que por vez primeira desde 1973, a mercancía xeral encabeza o reparto de tráficos portuarios, con máis de 450.000 toneladas, case 230.000 das cales corresponden ao movemento de contedores; en segundo lugar sitúanse os graneis sólidos, con case 350.000 toneladas, e os graneis líquidos ocupan a terceira posición, con algo máis de 200.000 toneladas, de acordo cos tráficos rexistrados ata o día de hoxe.
Aínda con este cambio de tendencia, cabe resaltar que o porto de Vilagarcía segue presentando un gran equilibrio en canto á importancia dos distintos tipos de mercancías no balance de tráficos, xa que a mercancía xeral representa o 45% do total de tráficos do porto, os graneis sólidos, o 34,5% e os graneis líquidos, o 20,5%.
A presidenta da Autoridade Portuaria, Sagrario Franco, expresou a súa confianza en que as actuacións recientemente inauguradas e as obras en curso, xunto co esforzo de toda a comunidade portuaria, "axúdennos a manter no próximo ano os resultados positivos deste 2012".
Neste sentido, o Consello de Administración do Porto aprobou o Plan de Empresa para o ano próximo, que prevé a realización de investimentos por un valor total de 4,2 millóns de euros, correspondentes á primeira fase de obra do ferrocarril a Ferrazo, traballos actualmente en curso e que está previsto terminar en 2013, e a outros investimentos xenéricos e menores, entre os cales o máis destacado é a dotación de seguridade e adecuación de accesos a Ferrazo, na que se investirán 450.000 euros.