Primeiros contactos entre PSOE e BNG para formar goberno en Ponte Caldelas
Por Redacción
A perda da maioría absoluta do Partido Popular en Ponte Caldelas non tardou en provocar os primeiros movementos. Representantes do PSOE e do BNG mantiveron este mércores unha reunión para negociar a posibilidade de formar un goberno de esquerdas por primeira vez no municipio.
Andrés Díaz e Enrique Vidal, por parte socialista; e Manuel Xesús Muíños e Manuel Barreiro, polos nacionalistas; foron os catro que mantiveron este primeiro encontro, que durou varias horas.
Tras a súa finalización, ambos os dous partidos emitiron un comunicado conxunto no que aseguran que as dúas organizacións "estamos de acordo en que é necesario un cambio para que Ponte Caldelas poida avanzar e mellorar a calidade de vida dos seus veciños".
Explican que sobre a mesa se puxeron os diferentes puntos de vista sobre as prioridades de actuación, necesidades e modelo de actuar ante un posible cambio de goberno. Ambos os dous coinciden en que, deste encontro, "saíron máis puntos en común que desencontros", asumindo que a participación, a transparencia, o consenso e a igualdade, son os piares fundamentais sobre os que cimentar o futuro acordo.
Antes de seguir negociando, en todo caso, o BNG consultará ás súas bases para debater as distintas propostas discutidas na reunión entre as dúas organizacións. A partir de aí, volveranse sentar para seguir negociando un pacto de goberno.
Para poder formar goberno, BNG e PSOE deberán contar tamén coa recén creada Agrupación Veciñal de Ponte Caldelas que, con Alfonso Gutiérrez á cabeza, logrou dous edís o pasado 24 de maio. Entre os tres sumarían sete concelleiros fronte aos seis do PP de Perfecto Rodríguez.