A inauguración do desdobramento da avenida de Vigo será unha homenaxe a Josefina Arruti
Por Redacción
A ministra de Fomento, Ana Pastor, acudirá o vindeiro luns 21 de setembro ao acto de inauguración da avenida Josefina Arruti, denominación que recibiu o desdobramento da avenida de Vigo, unha obra licitada e executada polo Concello de Pontevedra e financiada polo departamento gobernamental. Será, segundo desvelou este martes o goberno municipal, a partir das once da mañá.
A inauguración, que será aberta ao público e á que foron convidados todos os grupos políticos da corporación, contará cun paseo das autoridades polo novo viario, que une a rúa da Estación co nó do Pino, e coas intervencións do alcalde, Miguel Anxo Fernández Lores, e a ministra.
Pero non terá unicamente esta vertente política, xa que a inauguración pretende ser unha homenaxe á figura de Josefina Arruti, polo que tamén participarán familiares desta pontevedresa, represaliada durante a ditadura franquista.
O concelleiro Luís Bará lembrou que Josefina Arruti foi unha muller "sacrificada e perseguida" por ser a compañeira do alcalde de Pontevedra Bibiano Fernández Osorio Tafall e a súa firme defensa das liberdades. Foi encarcerada e sometida a arresto domiciliario durante tres anos. Grazas á súa familia, foi símbolo de solidariedade ao abrir o seu panteón para que se enterrasen nel numerosos represaliados durante a Guerra Civil e os anos da ditadura franquista.
Esta homenaxe cívica a unha das mulleres represaliadas durante esta época escura da nosa historia farase extensible a outras vítimas pontevedresas, que darán nome a outros espazos públicos da cidade.
Bará destacou que, xunto con esta vertente histórica, o Concello celebrará que con este novo viario, a zona sur da cidade experimentou unha "transformación absoluta e espectacular" en materia de seguridade viaria, mobilidade e accesibilidade e gañando novos espazos para os desprazamentos a pé por Pontevedra.
Relacionadas:
-
Na procura de solucións para os conflitos de tráfico que provoca o parking de Mercadona
Por Mónica Patxot & Anxo Lourido |
-
Pontevedra renderá homenaxe ás mulleres represaliadas e resistentes cun acto no Teatro Principal
Por Redacción |
-
Unha avenida para "unha muller valente, unha nai coraxe"
Por Cristina Saiz & Oskar Viéitez |
-
Marea non irá á inauguración da avenida Josefina Arruti polo "desprezo" de Ana Pastor aos pontevedreses
Por Redacción |
-
Ana Pastor e Miguel Anxo Fernández Lores, un encontro cargado de temas pendentes
Por Alejandro Espiño |
-
Propoñen dar o nome de Amalia Álvarez, viúva de Bóveda, a un parque na Eiriña
Por Alejandro Espiño |
-
Últimos retoques á Avenida Josefina Arruti
Por Mónica Patxot & Anxo Lourido |
-
Confirman que Josefina Arruti dará nome ao desdobramento da avenida de Vigo
Por Redacción |
-
Ábrese o desdobramento da Avenida de Vigo ao tráfico sen incidencias
Por Redacción |