Medio Ambiente e Industria, dispostas a que Elnosa permaneza na ría se elimina o mercurio
Por Anxo Lourido
A reunión entre os representantes do comité de empresa de Elnosa cos conselleiros de Medio Ambiente, Ethel Vázquez, e de Economía e Industria, Francisco Conde, serviu para confirmar que desde a Xunta de Galicia están dispostos a aceptar a permanencia da fábrica cloreira na súa actual localización na ría de Pontevedra, segundo indicou o presidente do comité, Avelino García.
Os responsables das consellerías indicaron que para que a empresa continúe terá que presentar o proxecto do cambio tecnolóxico no que conste a eliminación do mercurio. Ese proxecto terá que estar visado polo Concello de Pontevedra e aí é onde a empresa atoparía a oposición do goberno local.
Avelino García indicou que se mostraron sorprendidos polo cambio de posicionamento por parte da Xunta de Galicia ao atoparse agora cun "apoio" para que a empresa poida quedar en Lourizán. Este cambio vén propiciado, segundo o representante sindical, pola modificación da Lei de Costas. O acordo asinado coa Xunta, que establecía o traslado antes de decembro de 2017 quedaría como unha segunda opción no caso de que non se acometese a reforma tecnolóxica na empresa.
Con todo, os representantes dos traballadores entenden que a dirección de Elnosa ten a intención de poñer en marcha ese proceso de eliminación do mercurio que duraría ao redor de dous anos.
Ante esta situación, o comité de empresa quere manter un calendario de protestas dirixidas cara aos concellos que se mostren contrarios á súa posición. "O alcalde díxonos que non tiña ningunha competencia, pero si que as ten. E cando chegue o momento, nós vamos contestar e non vamos quedar quietos a esperar", apuntou Avelino García.
Relacionadas:
-
Os traballadores de Elnosa piden "enchufes" ante o Concello de Pontevedra
Por Redacción |
-
Lores acepta recibir á dirección de Elnosa, pero avísalles: "Non se poden quedar"
Por Redacción |
-
A participación dos traballadores de Elnosa no pleno de Poio remata con tensión e ameazas
Por Anxo Lourido |
-
O comité de empresa de Elnosa solicita a intervención no pleno de Poio
Por Anxo Lourido |
-
Lores comprende os traballadores de Elnosa pero mantén que a empresa debe abandonar a ría
Por Mónica Patxot & Anxo Lourido |
-
Os traballadores de Elnosa ampáranse na eliminación de emisións de mercurio para que a fábrica siga en Lourizán
Por Mónica Patxot & Anxo Lourido |