Os traballadores de Elnosa piden "enchufes" ante o Concello de Pontevedra
Por Redacción
Os traballadores de Elnosa tiraron de humor reivindicativo e ironía para manter o seu calendario de protestas en defensa dos seus postos de traballo cunha concentración ante o Concello de Pontevedra durante unha hora no que instalaron uns pequenos parrulos de goma na calzada. O máis grande levaba debuxado o nome de Lores.
Con esta referencia á Operación Patos, o presidente do comité de empresa de Elnosa, Avelino García, quería lembrarlle ao alcalde que "se el quere pechar Elnosa, que nos enchufe" e a continuación, xa en ton máis serio, lembraba que o que queren é que a empresa cumpra coa legalidade e que desde o goberno local os deixen traballar en Lourizán.
Avelino García recoñeceu que a Xunta de Galicia está a manter contacto coa empresa pero necesitan unha solución antes de finais de 2017. Desde o comité de empresa insisten en que a dirección da electroquímica está disposta a realizar un cambio de tecnoloxía na actual localización pero sempre que se lle garanta a permanencia.
Neste sentido, o máximo representante dos traballadores lamentou que Fernández Lores non reciba á dirección de Elnosa, que vén reclamándolle unha entrevista durante as últimas semanas: "Que non está dacordo? Vale, pero polo menos que os reciba", indicou Avelino García asegurando que a empresa non entende esta actitude.
Os traballadores aproveitaron esta xornada sen actividade escolar para solicitar unha hora de asemblea á empresa para realizar esta protesta ante o Concello: "as concentracións facémolas cando temos a oportunidade de contar co apoio dos familiares. Detrás dos empregos hai críos que van quedar sen sustentos", afirmou Avelino García.
Relacionadas:
-
Lores advirte a Elnosa que darlle licenza é "legalmente imposible" pola súa propia inacción
Por Alejandro Espiño |
-
Os traballadores de Elnosa tachan de "absoluto impresentable" ao alcalde e anuncian concentracións semanais
Por Oskar Viéitez & Cristina Saiz |
-
Lores acepta recibir á dirección de Elnosa, pero avísalles: "Non se poden quedar"
Por Redacción |
-
Medio Ambiente e Industria, dispostas a que Elnosa permaneza na ría se elimina o mercurio
Por Anxo Lourido |