200 quilos de comida solidaria e 'terrorífera'
Por Redacción
A Noite do Terror celebrada a pasada fin de semana en Sanxenxo deixou un saldo de máis de 200 quilos de alimentos non perecedoiros que desde este mércores está xa a disposición de Cáritas. Os directivos da entidade recolléronos no Pazo Emilia Pardo Bazán.
Os alimentos doáronos os pais dos alumnos que participaron na noite 'terrorífera'. O concelleiro de Cultura, Roberto Carlos Agís, agradeceulles a súa solidariedade e altruísmo á hora de colaborar cunha entidade que trata de dar resposta ás necesidades básicas de moitas familias de Sanxenxo.
O concelleiro convida as familias dos sesenta alumnos que participarán na sesión programada para o próximo día 27 a sumarse tamén á vertente solidaria das Noites de Terror, achegando alimentos non perecedoiros que serán de novo entregados a Cáritas, para que sexa esta entidade a que proceda á súa repartición entre as familias que o necesitan.