A Xunta de Goberno da Deputación aprobou a primeira parte das subvencións do Plan Concellos 2016 para a contratación de traballadores que cubran as necesidades da administración local ao longo do ano.

Esta liña de axudas ascende a 4.960.201 euros nos primeiros 38 concellos da provincia beneficiarios, supoñendo un total de 729 contratacións.

Entre os primeiros municipios que reciben a axuda para a contratación atópanse Barro (16 empregos), Bueu (30), Caldas de Reis (8), Cambados (29), Campo Lameiro (24), Cotobade (13), O Grove (30), A Illa (13), A Lama (14), Meaño (19), Meis (8), Poio (30), Ponte Caldelas (14), Portas (10) e Vilaboa (20 empregos)

Noutro aspecto, as partidas de investimento e pagos de gasto corrente, Cambados recibirá 135.767,02 euros en concepto de gasto corrente, Poio 123.354,32 euros en pago de débedas e Meis 65.241,35 euros en pago a acredores.

SUBVENCIÓNS A ENTIDADES DEPORTIVAS

Por outra banda, a administración provincial aprobou as bases para a concesión das primeiras subvencións a entidades e clubs deportivos para o deporte federado e para o deporte náutico, co fin de apoiar a súa participación en ligas e competicións de ámbito comarcal, provincial e autonómico.

A partida para o deporte federado ascende a 300.000 euros, mentres para as actividades de deporte náutico como vela, remo e piragüismo resérvanse 150.000 euros.

A concesión das subvencións realizarase a través dun procedemento de concorrencia competitiva e contan cun prazo para a presentación de solicitudes de 20 días hábiles a partir da publicación da convocatoria no Boletín Oficial da Provincia.