A Deputación aproba o convenio para o saneamento de Bora, Mourente e o río dos Gafos
Por Oskar Viéitez
O presidente en funcións da Deputación de Pontevedra, César Mosquera, anunciou este venres a aprobación en Xunta de Goberno do convenio co Concello de Pontevedra para levar a cabo as redes de saneamento nas parroquias de Mourente e Bora e no río dos Gafos. O orzamento total é de 2.114.157 e será aportado ao 50% polas dúas institucións. Segundo indicou o nacionalista trátase dunha "cantidade económica importante" porque as obras son "fundamentais e necesarias" para o municipio capitalino.
No caso do saneamento de Mourente e Bora, ampliarase a rede ata os lugares de O Pazo, Carabelos, Eirós e Leirados, chegando ata 160 casas, unha trintena máis das previstas inicialmente. Nestes momentos o proxecto está xa redactado e licitado, a punto de ser adxudicado: estanse a estudar as 23 ofertas recibidas.
Prevese que as obras, cun prazo de execución de nove meses, comecen neste ano, se ben a decisión é coordinar os traballos coas obras que o Ministerio de Fomento realizará na N-541 para non ter que despois levantar o asfalto. Os próximos pasos administrativos serán a aprobación do convenio por parte da Xunta de Goberno do Concello de Pontevedra e a sinatura pública entre ambas administracións, para a que, segundo anunciou Mosquera, se vai fixar data nos vindeiros días.
No caso do saneamento do río dos Gafos, o presidente en funcións lembrou que a Deputación asumiu o compromiso de colaborar co proxecto logo de que a Xunta de Galicia dixera que non se implicaba na súa execución. "Esta actuación leva parada moitos anos e que debe saír adiante canto antes, xa que as verteduras de augas residuais polos desbordamentos das arquetas son constantes, sobre todo cando hai moita chuvia", indicou Mosquera.
O novo proxecto de mellora da rede de sumidoiros do río dos Gafos foi redactado por técnicos municipais e aprobado inicialmente en xullo do 2014. A actuación consiste na reparación e substitución dos colectores e na impermeabilización ou cambio dos pozos situados ao longo do río entre a avenida da Estación e a rúa Otero Pedrayo, e entre esta vía e Lusquiños (Tomeza). A execución, segundo estiman os técnicos municipais, podería ter uns seis meses de prazo.
Segundo afirmou o presidente en funcións, o convenio entre Deputación e Concello de Pontevedra que recolle estas obras xorde polos intereses mostrados polo goberno local de Pontevedra, que foi quen priorizou as actuacións. "Como xa demostramos, a nosa prioridade é ir da man dos concellos, respectando a súa autonomía, xa que son os mellores coñecedores das necesidades dos seus veciños", finalizou.
Relacionadas:
-
As obras para completar o saneamento de Mourente iniciaranse antes de final de mes
Por Alejandro Espiño |
-
Novo paso para facer realidade o proxecto "altamente demandado" do saneamento do Gafos
Por Redacción | Creada e actualizada
-
O goberno pontevedrés vixiará as conexións á rede de saneamento no rural
Por Oskar Viéitez |
-
Os populares critican a tardanza na sinatura do convenio entre a Deputación e o Concello
Por Oskar Viéitez |
-
Deputación e Concello presumen da súa "extraordinaria relación"
Por Oskar Viéitez & Mónica Patxot |
-
O Concello e a Deputación asinarán o mércores o convenio para sanear o Gafos ao que renunciou a Xunta
Por Natalia Puga |
-
O goberno local pretende que as obras para sanear o río Gafos comecen antes de 2017
Por Redacción |
-
23 empresas optan a facer o saneamento pendente en Mourente e Bora
Por Redacción |
-
O Concello ten en execución e en carteira obras no rural por cinco millóns
Por Redacción |
-
Mourente completará o seu saneamento antes de que acabe o ano
Por Alejandro Espiño |
-
Valoran en 10 millóns de euros o protocolo asinado entre o Concello de Pontevedra e a Deputación
Por Cristina Saiz & Oskar Viéitez |