O bebés do Chop nacen cun diploma baixo o brazo
Por Redacción
Nome e apelidos; data, hora e lugar exactos do nacemento. Estes son os datos que se inclúen no diploma persoalizado que os hospitais de Pontevedra e o Salnés entregarán ás familias de todos os recén nados na área sanitaria. O peso e o talle dos bebés, son os outros datos que se engadirán no documento que xa se está agasallando no Hospital Provincial de Pontevedra e que proximamente se repartirá no Hospital do Salnés.
Dende a xerencia dos hospitais explicaron que esta nova iniciativa busca facer o momento da recepción do bebé moito máis especial, ademais de ser a forma de dar os parabéns por parte dos profesionais sanitarios aos proxenitores.
Ademais din que o agasallo deste diploma persoalizado pon especial atención no protagonismo da muller, pois un dos obxectivos desta entrega é poñer de relevancia o papel das nais durante o proceso do embarazo e celebrar o comezo da súa maternidade.
Persoal do Hospital Provincial de Pontevedra fixo entrega este martes do primeiro diploma na área sanitaria ao pai e á nai de Salma Martínez Zamora, unha meniña natural de Pontevedra que pesou 3,245 kilos e cuxo talle foi de 49,7 centímetros.
PLAN DE PARTO INDIVIDUALIZADO
No Chop rexístrase unha media de 185 partos ao mes
A entrega do diploma persoalizado está vencellado tamén ao Plan de Parto individualizado do Complexo Hospitalario de Pontevedra, a través do cal as mulleres teñen a posibilidade de sinalar as súas preferencias á hora de dar a luz, escoller dende o primeiro instante ao que será o seu acompañante durante o parto, a forma na que quere levar o proceso de dilatación ou os primeiros coidados que vai recibir o seu bebé, entre outros.
Na actualidade, no Complexo Hospitalario Universitario de Pontevedra rexístrase unha media de 185 partos ao mes, mentres que no hospital comarcal do Salnés, o total de nacementos que se produciron o pasado ano 2015 rondou os 660, o que supón unha media de 50-55 nacementos ao mes.