Antón Sobral, Verísimo Pazos, o Colexio de Avogados e Solidaridad Internacional optan ao Cidade de Pontevedra
Por Alejandro Espiño
Un total de dez candidaturas optarán este ano aos premios Cidade de Pontevedra. Así se confirmou despois de que este xoves finalizase o prazo para presentar as propostas. En concreto, haberá catro candidatos ao premio na categoría de persoa física e outros seis na de categoría de persoa xurídica. E a maioría ten un notable perfil de corte social.
Nas últimas horas presentáronse dúas candidaturas para recoñecer o labor de persoas físicas que contribuíron a engrandecer o nome de Pontevedra. Trátase do pintor Antón Sobral e do dirixente veciñal Verísimo Pazos.
A candidatura de Antón Sobral foi presentada pola federación de asociación de veciños Teucro, ao entender que debe recoñecerse a súa calidade artística e o seu labor como promotor cultural na cidade do Lérez; mentres que Verísimo Pazos foi proposto por Pilar Señoráns, pola súa traxectoria no asociacionismo veciñal.
Pola súa banda, o Colexio de Avogados de Pontevedra e a ONG Solidariedade Internacional tamén optarán ao premio, pero no seu caso, entre as entidades, asociacións ou colectivos que destacaron polo seu labor na cidade durante o último ano.
Os avogados pontevedreses foron propostos pola asociación Rexurdir, para recoñecer especialmente o seu traballo no servizo de xustiza gratuíta e para frear os desafiuzamentos; mentres que a candidatura de Solidariedade Internacional, unha das ONG máis antigas da cidade, parte da asociación de comerciantes da galería da Oliva.
Todos eles súmanse ás candidaturas de Ángela Paz e a deportista Lourdes Domínguez, que optan ao premio na categoría de persoas físicas; e de Difusión Felina, o HQR, a asociación Amigos da Pontevedrada e a ONG Boa Vida na de persoas xurídicas.
O xurado do premio Cidade de Pontevedra reunirase o 12 de xaneiro para decidir o nome dos premiados. Estará presidido pola concelleira Carmen Fouces, presidenta da comisión municipal de Cultura, e integrado por todos os membros da comisión, un representante veciñal, un membro dunha asociación cultural e un portavoz dos medios de comunicación.
Os premios que levan o nome da cidade entregaranse nunha sesión de honras do pleno municipal que se celebrará no Teatro Principal o 20 de xaneiro, día de San Sebastián.
Relacionadas:
-
RADIO.- Escoita un Cara a cara de premio
Por Marisa Ciordia |
-
Ángela Paz e o Colexio de Avogados, premios Cidade de Pontevedra 2016
Por Mónica Patxot & Anxo Lourido |
-
Cinco colectivos propoñen a asociación para a inclusión social Boa Vida ao premio Cidade de Pontevedra
Por Redacción |
-
Propoñen a Lourdes Domínguez como candidata ao premio Cidade de Pontevedra
Por Redacción |
-
A Pontevedrada, candidata aos premios Cidade de Pontevedra
Por Alejandro Espiño |
-
Ángela Paz, proposta para o premio Cidade de Pontevedra
Por Oskar Viéitez |
-
Vaipolorío propón á Asociación Difusión Felina para o premio Cidade de Pontevedra
Por Oskar Viéitez |